Categories
ఆంధ్రప్రదేశ్ తెలంగాణ పిలుపులు

తెలుగు భాషోద్యమ గీతాల కొరకు పిలుపు

తెలుగు తియ్యదనం గురించి, తెలుగు వ్రాతరుల గొప్పతనం గురించి, తెలుగు వ్రాయిల గొప్పతనం గురించి మట్టుకే ఇప్పటి వరకు పాటలు వచ్చాయి. తెలుగువారు కదిలేలా, కదం తొక్కేలా మీరు పాటలు వ్రాయగలరా? పాటలు విన్నాక పాడేవారు, వినే వారు, ఆడే వారు ఇక కదిలేవారిగా మారాలి. తెలుగుతో పాటు మన సంస్కృతి, కళలు, ఆటలు, పాటలు, పండుగలు, ఎఱుక చివరకు మన జాతే కడతేరి పోతుంది అన్నది తెలియజేయాలి.

తెలుగు జనాల్ని కదిలించగలిగే తెలుగు ఉద్యమ గీతాల కోసం తెలుగు కూటమి చూస్తోంది. మీ సొంత పాటలను ఈ క్రింద సమర్పించవచ్చు. (పాట రాసే ఆసక్తి ఉన్నా కూడా మీ వివరాలను మాకు తెలియజేయండి.)

ఎంచుకోబడిన పాటలకు తగు పైకపు కాన్కలు ఉంటాయి; పెద్దలతో మెచ్చాంకులు (appreciation certificates) ఇప్పిస్తాము.

మీ మిత్రులలో పాటలు రాసేవాళ్ళకు ఈ పిలుపు గురించి తెలియజేయండి.

(క్రింది ఫారం కనబడకపోతే, నేరుగా ఇక్కడ చూడండి.)

Categories
తెలంగాణ

ఊరూరా గోడలపై నినాదాలతో తెలుగు కూటమి ముందడుగు

మన అమ్మనుడిని బతికించుకోడానికి మన తెలుగుకూటమి గొప్ప ముందడుగు వేస్తున్నది ఇప్పుడు.
తెలంగాణ నాట అన్ని ఊర్లల్లోని బడులవద్ద, కాలేజీల వద్ద, రెవెన్యూ ఆఫీస్ ల వద్ద గోడలపైన నినాదాలు రాయ బూనినారు.

పదిమంది మన తెలుగు అనుగరులు ఒక వ్యాన్ లో వందరోజుల పాటు ఉరూరా తిరుగుతారు. తెలుగువారితో మాట్లాడుతారు, తెలుగు కోసము పోరాడామని చెప్తారు.

మన అమ్మనుడిపై మక్కువగల తెలుగువాళ్లు అందరూ బాగా దీన్ని మెచ్చుకోవలసిందే
తెలుగు వాళ్ళు అంతా ఈ పనిని పెద్ద ఎత్తున జరిగేలా ముందుకు తీసుకెళ్లాలి.
చుక్క చుక్క కలిసి కడలి అయినట్లు మనిషి మనిషి కలిస్తేనే ఉప్పెనలా ఈ ఉద్యమాన్ని ముందుకు తీసుకెళ్లి మన అమ్మనుడిని కాపాడుకోగలం.
తెలుగు వారి ఓట్లతో గెలిచినా పాలకులు తెలుగును పట్టించుకోవడం లేదు, వారిని దించాలంటే అది మనలోనే ఉంది . అందుకు అందరూ కదలండి, మన తెలుగు జాతిని లేకుండా చేసే ఏలికల పాడు బుద్ధిని ఎండగట్టండి.

మన వాట్సాప్ టెలిగ్రామ్ తెలుగుమాట జట్లలో మన తెలుగుకూటమి చేస్తున్న పనులను గమనించడమే కాకుండా మీ వంతుగా సహకారములు అందిస్తారని కోరుకుంటున్నాము.

మొదటిగా గజ్వేల్ లో గోడలపై తెలుగు నినాదాలు చూడగలరని వేడుకోలు.